玻璃碎样咯日子
一个寒假，流流荡荡咯我，被冬季冷飕飕咯风刮进新咯一年。整个寒假，我呒办法集中精力做任何事干，日加日咯空白。
春节前后，零零碎碎咯炮仗，拧臭咯小人，还有古板咯大人。昶记已经尤少望了见噢。道道徛嘞晒台望下头，过立春咯田叻，旧年落埭咯草籽在发芽。我独个光漠漠咯忖希奇八怪咯问题。
红花草开遍田路头咯景色，我咦呒机会亲眼望见噢。头日是因为繁忙咯高中，昶记是因为外地咯大学。我朆忖过，一些物事在我心里咯分量，可以烊掉我咯阴暗。
格个月，恰叻被汏精净咯衬衫，不剩一点痕迹；恰叻被晾燥咯衣裳，呒见半粒水珠。除了武汉转来噶趟火车，我还记叻牢，其他事干一点也呒印象。
晏界咯太阳光照进窗门阘，让我有烘暖咯感觉。黑玻璃碎样咯日子，我要把渠伊重新捡拾。
附：
远望
今年春节是过叻最乱咯一次。正月初一到初三都呒嘞屋里，从市内到乡下，从乡下到海山。
冬季咯噩梦还呒全醒，正月咯天也呒几日晴。远海上搭潽起咯滚水样，迷雾层层。我隑嘞曙光碑边咯栅栏上向，望近海上漂浮咯列岛。渠伊在蹿上蹿落咯海水里不做声响。
听风
正月十四，丙戌狗年少见咯太阳，照在人叻恰叻照嘞漤盐咯海鱼，呒让人硬挣咯力道。一早界，我也便只苶苶糊糊咯懵冲。
掇张凳头坐太阳下，春天咯风轻轻摇噶黑还呒生叶咯树丫杈。我听弗出渠咯心思，渠伊是一张敨不平咯纸。
我咯春天是一张敨不平咯纸。
